من طرف سارة ريمون المناهري الثلاثاء أغسطس 17, 2010 3:50 pmاتنين كانوا ماشيين فى مدينة من المدن فى شارع من الشوارع المليانه بالناس والعربيات والدوشه.
وكان واحد فيهم بيسأل التانى وبيقوله انا ليه مش قادر اسمع صوت ربنا؟؟
فرد عليه الشخص التانى بحكمه وقاله انت شايف الناس اللى حوالينا دى؟
الناس دى ماشيه فى وسط دوشه كبيره من صوت عربيات وصوت كلام الناس اللى حواليهم
وصوت موسيقى المطاعم والمقاهى لكن تعال هاوريلك حاجه غريبة.
ومسك شويه عملات معدنية ورماهم على الأرض كل الناس اللى حواليه بصوا على الأرض
بالرغم من ان صوت العملات ماكنش ابداً اعلى من صوت دوشة العربيات والكلام والموسيقى لكن بالرغم من كده الناس سمعت صوت العملات.
فرد عليه الشخص التانى وقاله فعلاً دى حاجه غريبه اوى بس انا مش فاهم ليه؟
قاله لأن إهتمام الناس كله هو الفلوس واهم حاجه عندهم ومحور تفكيرهم هو الفلوس
علشان كده من وسط كل الدوشه دى لفت نظرهم صوت الفلوس وشد انتباههم لأن هو ده محور تفكيرهم
لو انت محور تفكيرك ومحور اهتمامك كل يوم وانت ماشى وانت بتاكل وانت بتشتغل هو المسيح, بمجرد مايقولك على اى حاجه صغيره هاتسمعه وزى ما الناس دى ميزت صوت الفلوس من وسط الاف الأصوات الأعلى بكتير من صوت الفلوس, انت كمان هاتقدر تميز صوت ربنا من وسط آلاف الأصوات فى العالم لو هو محور تفكيرك واهتمامك طول اليوم
++++
عايز اقولكم على توضيح اكتر, لو انت واقف على محطة القطر ومستنى شخص المواصفات دى مثلاً لابس كاب وتيشرت اسود ونضاره شمس وواقف بتبص عليه و بتدور عليه فى وسط ١٠٠٠ شخص, اى شخص هايكون لابس كاب هايلفت انتباهك من وسط كل الناس دى
لأنك منتظر شخص بالمواصفات دى أما باقى الناس دى كلها هايكونوا بالنسبة ليك ولا كأنهم موجودين
+++
علشان تسمع صوت ربنا لما يكلمك ويرشدك لازم يكون هو محور تفكيرك طول اليوم
ومحور اهتمامك طول اليوم بمجرد ما هايهمس ليك بس هاتسمعه
منقول
